na.e mizaj ki tashkil karna chahte hain
ham apne aap ko tabdil karna chahte hain
qubul tark-e-ta.alluq nahin hai lekin ham
tumhare hukm ki ta.amil karna chahte hain
ghamon ke fiil na Dha den kahin ye ka.aba-e-dil
so ham dua-e-ababil karna chahte hain
hamare jalne se milti hai raushni tum ko
to raushan ab yahi qindil karna chahte hain
jab un ki koi bhi ta.abir pa nahin sakte
hava men ḳhvabon ko tahlil karna chahte hain
kitab-e-zist men mushkil hai bab-e-ishq ‘nadim’
ham aise baab ki takmil karna chahte hain
Leave a Reply