yadon se mahakti hui is raat men kya hai
ye raaz khula aaj ki jazbat men kya hai
ik tujh se hi ummid laga rakkhi hai varna
ye mujh ko ḳhabar hai ki miri zaat men kya hai
ye kah ke parindon ne bhari aaj uḌanen
shahron ki taraf chalte hain dehat men kya hai
yuun ghaur se hathon ki lakiren na paḌha kar
bigḌenge sanvar ja.enge halat men kya hai
khinchte hi chale aate hain dil shahr-e-havas men
jaadu tiri ankhon men tiri baat men kya hai
pahle to daraḳhton se nikalti thiin karahen
is baar zara dekhiye barsat men kya hai
Leave a Reply