mire liye to ye bekar hone vaala hai
ye dil ki dard se bezar hone vaala hai
main us se ḳhvab ke raste pe milne aaya huun
magar vo niind se bedar hone vaala hai
jo faisla sar-e-darbar hone vaala tha
vo faisla pas-e-divar hone vaala hai
suna hai yusuf-e-sani vahan nahin aaya
suna hai ḳhatm vo bazar hone vaala hai
vo jis ke haath se qisse ne maut paa.i hai
suna hai sahab-e-kirdar hone vaala hai
Leave a Reply