Masood Akhtar Jamal
samjhe the be-ḳhabar jinhen hushyar vo bhi hain
saaqi is anjuman ke nigah-dar vo bhi hain
jin ke lahu se daman-e-sahra hai lala-rang
ai nargis-e-chaman tire bimar vo bhi hain
arbab-e-mai-kada se abas zid hai shaiḳh ko
ḳhush-fikr-o-ḳhush-mizaj-o-ḳhush-atvar vo bhi hain
la.a-e-giran-baha ko samajhte hain jo ḳhazaf
yarab mata-e-dil ke ḳharidar vo bhi hain
chup hain vo sun ke aaj miri dastan-e-gham
insaf kya karen ki ḳhatavar vo bhi hain
taufiq jin ko ma.asiyat-e-ishq ki nahin
ai rahmat-e-tamam gunahgar vo bhi hain
ḳhud apne haal ki bhi jinhen kuchh ḳhabar nahin
dair-o-haram ke mahram-e-asrar vo bhi hain
bad-tar hain dushmanon se kuchh aise bhi hain rafiq
jin ko shu.ur-e-gham nahin gham-ḳhvar vo bhi hain
samjhe hain jo hayat ko ḳhvab-e-giran ‘jamal’
zid hai unhen ki sha.ir-e-bedar vo bhi hain
Leave a Reply