har har varaq pe kyuun ki likhun dastan-e-hijr
aata nahin zaban-e-qalam par bayan-e-hijr
zahir agarche taza-o-tar misl-e-lala huun
mujh dil men janashin hai dagh-e-nihan-e-hijr
pazhmurda kyuun na hoe gul-e-ummid-e-ashiqan
bahti hai dil ke baagh men bad-e-khizan-e-hijr
ab-e-hayat vasl siin de umr-e-javedan
hai be-qarar gham siin tire nim-jan-e-hijr
vo ashiqi ki misl men manzur hai mudam
chille main gham ke baith jo khincha kaman-e-hijr
niin sair-e-lala-zar ki ashiq kuun aarzu
az-bas hai dagh-e-sina gul-e-bostan-e-hijr
jaari ba-rah-e-chashm sati khun-e-dil ‘siraj’
jab siin mire jigar men lagi hai sinan-e-hijr