Aziz Nabeel
suno musafir! sara.e-jan ko tumhari yaden jala chuki hain
mohabbaton ki hikayaten ab yahan se Dera uTha chuki hain
vo shahr-e-hairat ka shahzada giraft-e-idrak men nahin hai
us ek chehre ki hairaton men hazar ankhen sama chuki hain
ham apne sar par guzishta din ki thakan uTha.e bhaTak rahe hain
dayar-e-shab teri ḳhvab-gahen tamam parde gira chuki hain
badalte mausam ki silvaTon men dabi hain hijrat ki dastanen
vo dastanen jo sunne valon ki niind kab ki uḌa chuki hain
vo saari sub.hen tamam shamen ki jin ke mathe pe ham likhe the
suna hai kal shab tumhare dar par lahu ke aansu baha chuki hain
kahan se aa.e the tiir ham par, tanaben ḳhemon ki kis ne kaTin
gurez karti hava.en ham ko tamam baten bata chuki hain
dhuen ke badal chhaTe to ham ne ‘nabil’ dekha ajiib manzar
ḳhamoshiyon ki sulagti chiḳhen faza ka siina jala chuki hain
Leave a Reply