Nuqush-E-Ahd-E-Guzashta Ubhaarne Ke Liye

nuqūsh-e-ahd-e-guzashta ubhārne ke liye

maiñ kheltā huuñ har ik khel hārne ke liye

tirā hasīn tasavvur hī kam nahīñ ai dos

ġham-e-hayāt ke gesū sañvārne ke liye

sameT le ġham-e-kaunain apne dāman meñ

junūn-e-ishq nayā ruup dhārne ke liye

tamām-umr mirī zindagī rahī betāb

sukūn kā koī lamha guzārne ke liye

jigar ke zaḳhmoñ pe kyā kyā guzar ga.ī ‘nashtar’

ye mehr-o-māh zamīñ par utārne ke liye

Leave a Comment