nuqush-e-ahd-e-guzashta ubharne ke liye
main khelta huun har ik khel harne ke liye
tira hasin tasavvur hi kam nahin ai dos
gham-e-hayat ke gesu sanvarne ke liye
sameT le gham-e-kaunain apne daman men
junun-e-ishq naya ruup dharne ke liye
tamam-umr miri zindagi rahi betab
sukun ka koi lamha guzarne ke liye
jigar ke zaḳhmon pe kya kya guzar ga.i ‘nashtar’
ye mehr-o-mah zamin par utarne ke liye
Leave a Reply