Rasa Chughtai
shaam se pahle ghar ga.e hote
ya sar-e-sham mar ga.e hote
is gadayana zindagi se to
vaz.a-darana mar ga.e hote
yuun bhi ik umr ra.egan guzri
yuun bhi kuchh din guzar ga.e hote
tu jo dil se utar gaya hota
zaḳhm dil ke ubhar ga.e hote
ham na hote to hadsat-e-jahan
jaane kis kis ke sar ga.e hote
koi daman-kash-e-ḳhayal na tha
varna ham bhi Thahar ga.e hote
sham-e-mahfil na the ki mahfil men
le ke ham zaḳhm-e-sar ga.e hote
Leave a Reply