Sikandar Ali Wajd
shamim-e-zulf-e-yar aa.e na aa.e
mire dil ko qarar aa.e na aa.e
abhi aaya hai hosh ai yad-e-janan
na taḌpa baar baar aa.e na aa.e
charagh-e-zindagani bujh raha hai
vo jan-e-intizar aa.e na aa.e
kiya jo tum ne apne dil se puchho
hamara e’tibar aa.e na aa.e
nigah-e-ahl-e-gulshan kah rahi hai
ḳhizan jaa.e bahar aa.e na aa.e
baḌhega karvan manzil-ba-manzil
ghubar-e-rah-guzar aa.e na aa.e
Leave a Reply