Sharab-O-Shisha-O-Saghar Subu-O-Paimana

sharāb-o-shīsha-o-sāġhar subū-o-paimāna

fidā-e-nīm-nigāhī tamām mai-ḳhāna

qadam qadam pe mashiyyat ne paañv chūme haiñ

ye kis maqām se guzrā hai terā dīvāna

kabhī kabhī to haram kyā hai but-kada kyā hai

maiñ tere dar se bhī guzrā huuñ be-niyāzāna

usī ke dam se hai raushan harīm-e-ka.aba-e-dil

ḳhudā kare ki na gul ho charāġh-e-but-ḳhāna

jamāl-e-yār jhalaktā hai ‘ārzū’ jis meñ

mirī ġhazal hai vo rañgīn ā.ina-ḳhāna

Leave a Comment