abdul-majeed-hairat

Marham-e-Zakhm-e-Jigar Ho Jae

marham-e-zakhm-e-jigar ho jaae

ek aisi bhi nazar ho jaae

ik ishara bhi agar ho jaae

is shab-e-gham ki sahar ho jaae

sub.h ye fikr ki ho jaae shaam

shaam ko ye ki sahar ho jaae

ho na itna bhi pareshan koi

ki zamane ko khabar ho jaae

yuun to jo kuchh bhi kisi par guzre

dil na afsurda magar ho jaae

fikr-e-farda bhi karenge ‘hairat’

pahle ye shab to basar ho jaae

More Poems

Leave a Comment