ruuh ke jalte ḳharabe ka mudava bhi nahin
dard vo badal hai jo khul kar barasta bhi nahin
shahr ke zindan ne pahna diin vo zanjiren mujhe
meri vahshat ko mayassar dil ka sahra bhi nahin
jis men bah jaa.e safine ki tarah mera vajud
meri ankhon se ravan gham ka vo dariya bhi nahin
karb ka suraj siva neze pe hai Thahra hua
dil mira hai barf-zar aisa pighalta bhi nahin
mujh ko yakja.i ki hasrat se bhala kya vasta
main to ji bhar kar sar-e-afaq bikhra bhi nahin
muddaton dar par mire vo dastaken deta raha
main magar vo niind ka maata ki chaunka bhi nahin
Leave a Reply