Afzal Ahmad Syed
gira to gir ke sar-e-khak-e-ibtizal aaya
main tegh-e-tez tha lekin mujhe zaval aaya
ajab hua ki sitara-shanas se mil kar
shikast-e-anjum-e-nau-khez ka khayal aaya
main khak-e-sard pe soya to mere pahlu men
phir ek khwab-e-shikast aina-misal aaya
kaman-e-shakh se gul kis hadaf ko jaate hain
nasheb-e-khak men ja kar mujhe khayal aaya
koi nahin tha magar sahil-e-tamanna par
hava-e-sham men jab rang-e-indimal aaya
yahi hai vasl dil-e-kam-muamla ke liye
ki aaine men vo khurshid-e-khadd-o-khal aaya
Leave a Reply