zard patta jo Daal se nikla
hasraton ke vabal se nikla
apna vahm-o-guman qavi kar ke
vaqt-e-aḳhir zaval se nikla
zindagi ka tavil hangama
laal suraj ke thaal se nikla
log chup the magar vo afsana
vaqt ke qil-o-qal se nikla
mahv-e-hairat hai aaj tak manzil
rasta kaisi chaal se nikla
vo zaman aur makan se aage tha
mutma.in har ḳhayal se nikla
kaise tai ho bacha hua rasta
sher baiTha hai jaal se nikla
lo baghal men sameT kar rakh lo
haath ThanDa hai shaal se nikla
kaisa mub.ham javab ai ‘ja.afar’
mere vazeh saval se nikla
Leave a Reply