Narm Phulon Se Kabhi Khaar Se Lag Jate Hain

narm phūloñ se kabhī ḳhaar se lag jaate haiñ

ham vo jugnū haiñ jo dīvār se lag jaate haiñ

do yatīmoñ kī mohabbat hai ye jo uḌte hue

ḳhushk patte mire ruḳhsār se lag jaate haiñ

itnī hamdardī se mat dekh mirī āñkhoñ meñ

kuchh maraz dīda-e-bīmār se lag jaate haiñ

jab tasavvur ke ḳharābe meñ tū aa jaatā hai

andar andar ka.ī bāzār se lag jaate haiñ

roz ronā hai jinheñ shāna kahāñ tak DhūñDhe

ham to rote hue dīvār se lag jaate haiñ

Leave a Comment