narm phulon se kabhi ḳhaar se lag jaate hain
ham vo jugnu hain jo divar se lag jaate hain
do yatimon ki mohabbat hai ye jo uḌte hue
ḳhushk patte mire ruḳhsar se lag jaate hain
itni hamdardi se mat dekh miri ankhon men
kuchh maraz dida-e-bimar se lag jaate hain
jab tasavvur ke ḳharabe men tu aa jaata hai
andar andar ka.i bazar se lag jaate hain
roz rona hai jinhen shana kahan tak DhunDhe
ham to rote hue divar se lag jaate hain
Leave a Reply