nahin ma.alum vo apni vafa ko kya samajhte hain
tire inkar karne ko bhi jo va.ada samajhte hain
zamane ko tumhara aur tumhen apna samajhte hain
agar aisa samajhte hain to kya beja samajhte hain
na puchho ham mohabbat ki ḳhalish ko kya samajhte hain
ye vo ne.amat hai jis ko hasil-e-duniya samajhte hain
pahunch jaane men un tak hai to bas ye zindagi haa.il
ham apni saans ko bhi raah ka kanTa samajhte hain
zamin se sar uThate hi nigahen chaar ho jaa.en
haqiqat men usi sajde ko ham sajda samajhte hain
sunana tha dil-e-betab ka qissa suna Daala
vo sun kar dekhiye kya sochte hain kya samajhte hain
unhin ke vaste hain imtihan-e-ishq ki qaiden
jo apni hasti-e-mauhum ka mansha samajhte hain
vafadaron se puchho narḳh apni jins-e-ulfat ka
agar sar de ke bhi mil jaa.e to sasta samajhte hain
unhin ke sar raha karta hai mohra na-ḳhuda.i ka
jo qatre ki haqiqat ko bhi ik dariya samajhte hain
gila be-sud hai ai ‘jurm’ be-mehri-e-alam ka
bura kuchh log kahte hain to kuchh achchha samajhte hain
Leave a Reply