ji-daro! dozaḳh ki hava men kis ki mohabbat jalti hai
tez dahakti aag zamin par ḳhandaq ḳhandaq chalti hai
asebi si sham.en le kar sayyaron men ghuum ga.i
koi hava aisi hai ki duniya niind men uTh kar chalti hai
kohsaron ki barf pighal kar dariyaon men ja nikli
kuchh to pas-e-ab-e-ravan kar nabz-e-junun kya chalti hai
raat ki raat Thaharne vaale vaqt-e-ḳhush ki baat samajh
sub.h to ik darvaza-e-gham par duniya ankhen malti hai
ḳhush-bu shahr-e-badi ka jaadu ek hadis-e-tilism hui
hauz men khilta gul-e-baka.uli ḳhush-bu is men palti hai
qindil-e-rahib ka jaadu asebi taron ke moḌ
kaaT ke vaqt ki ik parchha.in ḳhvab-numa si chalti hai
shams o qamar ki ḳhakistar men ruuh thi ik ara.ish ki
duniya biich men ja ke khaḌi hai aur libas badalti hai
ḳhakistar dil ki thi aḳhir milti raakh men taron ki
atish-e-mahr sa jast sa karti bujhte bujhte jalti hai
mutrib-e-ḳhush-avaz hui hai zaḳhm-avar ahang-e-bala
vo jo mire hisse ki lai thi tere gale men Dhalti hai
Leave a Reply