apni ḳhata ko is ne mire naam likh diya
us par kamal ye ki sar-e-am likh diya
andhon ke darmiyan rahun aa.ina misal
mere liye ḳhuda ne ajab kaam likh diya
naraz hai vo mujh se bas itni si baat par
tira-shabi ko din na likha shaam likh diya
kuchh ban paḌa na hasrat-e-tamir se to phir
ujḌe hue khanDar ko dar-o-bam likh diya
jab tirgi baḌhegi to chamkega aur bhi
dil ke lahu se ham ne tira naam likh diya
kahte hain kis ko sabr-o-tahammul ye ham se puchh
taklif jo mili use aram likh diya
ye bhi hua ki jis ne ujaḌe the ghar ke ghar
munsif ne us ko la.eq-e-in.am likh diya
chahi thi main ne jis ki bhala.i tamam umr
us ne miri duaon ko dushnam likh diya
koi to baat hogi ki ahl-e-nigah ne
jitne samar the puḳhta unhen ḳhaam likh diya
ab vasta paḌa hai to ‘mahir’ khula ye raaz
patthar badan ko ham ne gul-andam likh diya
Leave a Reply