din bahut saffak nikla raat sab dukh sah ga.i
daant men ungli daba.e shaam tanha rah ga.i
sang-rezon ki tarah bikhri paḌi hain ḳhvahishen
dekhte hi dekhte kis ki haveli Dah ga.i
sandali ḳhvabon men lipTe the hazaron azhdahe
aur phir tasir jism-o-jan men tah-dar-tah ga.i
be-muravvat sa.aton ko roiye kyuun umr bhar
ek shai ankhon men jo rahti thi kab ki bah ga.i
ghar ki divaron pe sabza bin ke ugna tha mujhe
ik hava sahra se aa.i kaan men kuchh kah ga.i
Leave a Reply