aalam ke doston men muravvat nahin rahi
sharm-o-haya-o-mehr va shafqat nahin rahi
zahir men kya rafiq kahate hain aap kuun
lekin unon ke dil men mohabbat nahin rahi
milte hain rasti siin jo koi kaj-nazar mile
khvabon men pak-baz ki hurmat nahin rahi
har khaar bul-havas ke kiye sohbat ikhtiyar
to husn gul-rukhon men latafat nahin rahi
na-layqon men umr kuun karnan abas talaf
ham-sohbati ki un men liyaqat nahin rahi
bhule hain har sanam ke karishme pe hosh kuun
in zahidon men kashf-o-karamat nahin rahi
sifle hue aziiz aziiz ab hue kharab
be-jauharon men qadr-e-sharafat nahin rahi
mat ho bahar-e-gulshan-e-duniya ka andalib
is phulban men bu-e-rifaqat nahin rahi
ab zat-e-haq baghair na rakh dosti ‘siraj’
aalam men ashnai-o-ulfat nahin rahi
Leave a Reply