ham se ashufta-mizajon ka pata puchhti hai
kitne baaqi hain diye roz hava puchhti hai
roz kaliyon ko khilate hue karti hai saval
kaisi daman ki mahak hai ye saba puchhti hai
kis jagah tujh ko Thaharna hai tamanna-e-jahan
laḌkhaḌate hue ye laghzish-e-pa puchhti hai
tishnagi aur hai sahra-e-tamanna kitni
jo barasti nahin khul ke vo ghaTa puchhti hai
raqs karte hue zarron se main sunti huun sada
gard uḌte hue anjam mira puchhti hai
mehrban gardish-e-halat hai utni mujh par
koi puchhe ki na puchhe ye saba puchhti hai
Leave a Reply