harza-sara.i bain-e-suḳhan aur baḌh ga.i
sasta hua to qimat-e-fan aur baḌh ga.i
jaana ki dost hi tha masiha ke ruup men
dil par rakha jo haath jalan aur baḌh ga.i
jaane kahan se aa.i thi kal raat ko hava
khiḌki khuli to ghar men ghuTan aur baḌh ga.i
pahle hi hath-paon hasin kam na the magar
rang-e-hina se un ki phaban aur baḌh ga.i
yaum-e-jaza men fitna-e-mahshar ki ḳhair ho
pahle hi jo thi sarv-badan aur baḌh ga.i
sahra ko dekhne ka to bachpan se shauq tha
dil ko laga liya to lagan aur baḌh ga.i
vo to mire manane se ‘aḳhtar’ bigaḌ ga.e
mathe pe ek gahri shikan aur baḌh ga.i
Leave a Reply