Tarikiyon Ko Aag Lage Aur Diya Jale

tārīkiyoñ ko aag lage aur diyā jale

ye raat bain kartī rahe aur diyā jale

us kī zabāñ meñ itnā asar hai ki nisf shab

vo raushnī kī baat kare aur diyā jale

tum chāhte ho tum se bichhaḌ ke bhī ḳhush rahūñ

ya.anī havā bhī chaltī rahe aur diyā jale

kyā mujh se bhī aziiz hai tum ko diye kī lau

phir to merā mazār bane aur diyā jale

sūraj to merī aañkh se aage kī chiiz hai

maiñ chāhtā huuñ shaam Dhale aur diyā jale

tum lauTne meñ der na karnā ki ye na ho

dil tīrgī meñ gher chuke aur diyā jale

Leave a Comment