Shahid Kamal
sochta hai kis liye tu mere yaar de mujhe
thak chuka huun nafraton se thoḌa pyaar de mujhe
kaun huun mujhe to apna naam bhi pata nahin
koi mera naam le ke phir pukar de mujhe
in ḳhirad ki hila-saziyon se tu amaan de
daftar-e-junun men koi karobar de mujhe
aaj apne hi muqable pe DaT gaya huun main
tegh koi bhej koi rahvar de mujhe
is ana ki jang men tu fat.h-yab kar mujhe
ye sharaf bhi aaj mere shahsavar de mujhe
kuchh ḳhabar to de mire musafiron ki a saba
kuchh nishan-e-kucha-ha-e-be-dayar de mujhe
TuuT kar bikharta ja raha huun is tarah se main
kaash koi haath baḌh ke phir sanvar de mujhe
‘shahid’-e-nava-e-asr ke suḳhan ki qadr kar
lahja-e-sukut harf-e-e’tibar de mujhe
Leave a Reply