ba-faiz-e-agahi ye kya azaab dekh liya
ki ḳhud hi apne kiye ka hisab dekh liya
ye nasl nasl masafat bahal rahi hai yunhi
sarab jagte sote men ḳhvab dekh liya
dilon ki tirgi dhone ko log uThe hain jab
chhaton par utra hua aftab dekh liya
saron se taaj baḌe jism se aba.en baḌi
zamane ham ne tira intiḳhab dekh liya
vo faḳhta jise laana tha amn ka paigham
uḌi nahin thi ki us ne uqaab dekh liya
kabhi vo khul ke kabhi sarsari mila ham se
kabhi hilal kabhi mahtab dekh liya
kitab paḌhne ki fursat yahan kise ‘anjum’
bahut hua to faqat intisab dekh liya
Leave a Reply