Kisi Hakim Na Attar Se Shifa Hogi

Qamar Aasi

kisi hakim na attar se shifa hogi

visal-e-husn-e-tarah-dar se shifa hogi

hamare sar men hai sauda-e-vahshat-e-paiham

hamen jamal-e-ruḳh-e-yar se shifa hogi

ai tegh-e-chashm-e-sanam kar jigar pe tirchha vaar

agar hui to usi vaar se shifa hogi

naqab-e-ruḳh ko dam-e-vasl alvida.a kahiye

mariz-e-hijr ko didar se shifa hogi

dava se baḌh ke dava hai laban-e-surḳh ka lams

qatil-e-husn ko hathiyar se shifa hogi

dikhaya jaa.e unhen aa.ina bara.e shifa

to apne aks-e-sharar-bar se shifa hogi

phir azma.enge ik nusḳha-e-ghalat ‘asi’

agar na aap ko ash.ar se shifa hogi