Etibar Sajid
tilism-zar-e-shab-e-mah men guzar jaae
ab itni raat gae kaun apne ghar jaae
ajab nasha hai tire qurb men ki ji chahe
ye zindagi tiri aghosh men guzar jaae
main tere jism men kuchh is tarah sama jaun
ki tera lams miri ruuh men utar jaae
misal-e-barg-e-khizan hai hava ki zad pe ye dil
na jaane shakh se bichhde to phir kidhar jaae
main yuun udaas huun imshab ki jaise rang-e-gulab
khizan ki chaap se be-sakhta utar jaae
hava-e-sham-e-judai hai aur gham lahaq
na jaane jism ki divar kab bikhar jaae
agar na shab ka safar ho tire husul ki shart
farogh-e-mahr tira e’tibar mar jaae
Leave a Reply