Aurat Hun Magar Surat-E-Kohsar Khadi Hun

aurat huun magar surat-e-kohsar khadi huun

ik sach ke tahaffuz ke liye sab se ladi huun

vo mujh se sitaron ka pata puchh raha hai

patthar ki tarah jis ki anguthi men jadi huun

alfaz na avaz na hamraz na dam-saz

ye kaise dorahe pe main khamosh khadi huun

is dasht-e-bala men na samajh khud ko akela

main chob ki surat tire kheme men gadi huun

phulon pe barasti huun kabhi surat-e-shabnam

badli hui rut men kabhi savan ki jhadi huun

Leave a Comment