main vo majnun ki ik sahra hai mujh men
vo sahra bhi bahut simTa hai mujh men
mujhe ḳhud se nikalega vo aḳhir
ba-nam-e-ishq jo aaya hai mujh men
tumhari yaad ko kaise nikalun
ki baaqi kuchh nahin bachta hai mujh men
kisi ke barf se lahje ke hathon
ajab sho.ala sa ik bhaḌka hai mujh men
koi taviz ka paani pila do
koi jadugari karta hai mujh men
kamini ko ḳhabar is ki nahin hai
ki sar se paanv tak dhoka hai mujh men
tumhare ba.ad ye dekha nahin hai
na-jane kaun ab rahta hai mujh men
tumhen meri zarurat bhi paḌegi
purane shahr ka naqsha hai mujh men
tumhari samt hijrat kar chuka hai
kahan ‘is.haq’ ab rahta hai mujh men
Leave a Reply