Dil Ki Raghbat Hai Jab Aap Hi Ki Taraf

Ehsan Danish

dil ki raghbat hai jab aap hi ki taraf

kis liye aankh uThti kisi ki taraf

kaisi uljhan he bazi-gah-e-shauq men

ham hain in ki taraf vo kisi ki taraf

sirf ashk-o-tabassum men uljhe rahe

ham ne dekha nahin zindagi ki taraf

ham jo ghol-e-bayaban se vaqif nahin

chal diye duur ki raushni ki taraf

dair-o-ka.aba se pyasi jabinen liye

aa ga.e ham tiri bandagi ki taraf

raat Dhalte jab un ka ḳhayal aa gaya

TukTuki bandh ga.i chandni ki taraf

jab na qasd-e-ḳhudi ke dariche khule

ahl-e-dil ho liye be-ḳhudi ki taraf

ham ne dil ki lagi un se ki thi bayan

baat vo le ga.e dil-lagi ki taraf

jada-e-agahi par baḌi bhiiḌ thi

saikḌon muḌ ga.e gumrahi ki taraf

hain mire halqa-e-ilm men bil-yaqin

asman ke payam aadmi ki taraf

un ke jalvon ki janib nazar uTh ga.i

mauj thi baḌh ga.i chandni ki taraf

kaun sa jurm hai kya sitam ho gaya

aankh agar uTh ga.i aap hi ki taraf

jaane vo multafit huun kidhar bazm men

ansuon ki taraf ya hansi ki taraf

us ke pindar-e-ḳhud-agahi par na ja

dekh insan ki bechargi ki taraf

apne mahaul men kyuun andhera karen

der tak dekh kar raushni ki taraf

maut ki raah asan ho ja.egi

pyaar se dekhiye zindagi ki taraf

ham junun-mand bhi itne vaqif to hain

aql ka ruḳh hai varaftagi ki taraf

sha.iri ki kisi manzil-e-dard men

ik daricha hai paighambari ki taraf

jaane ankhon ne ankhon se kya kuchh kaha

zindagi jhuk ga.i zindagi ki taraf

‘danish’ inkar ḳhaliq se hota nahin

dekhta huun main jab aadmi ki taraf