Poet
buto khuda pe na rakkho moamla dil ka
bura-bhala yahin ho jaae faisla dil ka
buton se hai mutaalliq moamla dil ka
khuda hai hashr men bhi ho jo faisla dil ka
chalo bala se agar hai ye astin ka saanp
baghal men paal ke main kya karun gila dil ka
khayal-e-zulf men siine pe saanp lotte hain
dahan-e-mar ka chhala hai aabla dil ka
sunun tumhari ki apni kahun haqiqat-e-hal
tumhen hai meri shikayat mujhe gila dil ka
khuda ye nala-o-fariyad saz-var kare
ki dil-lagi hai hamari ye mashghala dil ka
bhatak ke koi gaya dair ko koi kaabe
ajiib bhul-bhulayyan hai marhala dil ka
main ishq-e-qad men alif khinch kar hua huun faqir
main zulf-e-yar se rakhta huun silsila dil ka
kisi ke zulf ne barham kiye hain hosh-o-havas
luta hai shaam ke raste men qafila dil ka
khizan-rasidon ko bagh-o-bahar se kya kaam
na ab vo josh-e-tabiat na valvala dil ka
zamana aur hai aubashiyon ka vaqt nahin
na vo mizaj hamara na hausla dil ka
ye kis sanam ki mohabbat men martaba paaya
hua jo arsh-e-khuda se muqabla dil ka
kamal yaar ke hathon jala huun men ai ‘bahr’
hatheli ka hai phaphola ye aabla dil ka
Leave a Reply