sher kahne ka maza hai ab to
dil ka har zaḳhm hara hai ab to
itna be-sarfa na tha dil ka lahu
baagh daman pe khila hai ab to
bujh hi jaa.e na kahin dil ka charagh
vaqa.i tund hava hai ab to
zindagi zindagi hoti thi kabhi
mar na jaane ki saza hai ab to
tha koi shaḳhs kabhi mahram-e-dil
vo mujhe bhuul chuka hai ab to
ḳhugar-e-shahr hue divane
chak-e-daman bhi siya hai ab to
dil ka ye haal hamesha to na tha
jaane kya mujh ko hua hai ab to
Leave a Reply