Athar Shakeel
aa ga.e ho to raho saath sahar hone tak
ham bhi shayad hain yahi raat basar hone tak
nama-bar sust-qadam us pe ye rah-e-dushvar
zinda rahna hai hamen un ko ḳhabar hone tak
dam nahin lenge kisi taur ye khate hain qasam
zulm ki ahani divar men dar hone tak
asmanon se laḌi dil se nikal kar ik aah
ek pal chain se baiThi na asar hone tak
aql ḳhamosh tamasha.i ki tasvir bani
ishq Takraya hai maidan ke sar hone tak
ḳhvab-e-ghaflat se na bedar hue ham jo abhi
zulm baḌhta hi rahega ye sahar hone tak
us ke kun kahne se taḳhliq hue kaun-o-makan
der kya lagti hai miTTi ko bashar hone tak
lauT aane ko kaha us ne to ankhen ‘at.har’
ham ne raste pe rakhin us ka guzar hone tak
Leave a Reply