ḳhvab dekhe the suhane kitne
jaag uThe dard purane kitne
ek jalve ki faravani se
ban ga.e a.ina-ḳhane kitne
chaal se haal ki laate hain ḳhabar
log hote hain siyane kitne
buujh kar bhi na bata.un tujh ko
teri muTThi men hain daane kitne
be-irada jo hue ashk-e-ravan
luT ga.e gham ke ḳhazane kitne
tum zara ruuTh ke dekho to sahi
log aate hain manane kitne
ham ne sirf ek tabassum ke liye
zaḳhm khaa.e hain na jaane kitne
Duub marne ka nahin koi javaz
zinda rahne ke bahane kitne
sard-mehri se tiri mahfil men
jal-bujhe log na jaane kitne
yad-e-mazi se simaT aa.e hain
ek lamhe men zamane kitne
ik nazar dekha tha us ne ‘sahir’
gaḌ.h liye dil ne fasane kitne
Leave a Reply