Chhu Kar Hawa Pata Tere Ashkon Ka De Gai

Shaista Mufti

chhu kar hava pata tire ashkon ka de ga.i

dil ka qarar chain nigahon ka le ga.i

be-ḳhvab meri niind ki jis tarah shab Dhale

ik sham.a dil ka dard akele sahe ga.i

mauzun hua na koi bhi dil men ḳhayal-e-shauq

dil men jo aarzu ki chita thi jale ga.i

sahil pe jis qadar bhi gharaunde the bah ga.e

divar jo vafaon ki zamin thi Dhe ga.i

manzar badal badal ke mujhe de gaya sarab

dil ka yaqin qimti shai thi vo shai ga.i

tasir gham bhulane ki kho di sharab ne

jon hi hamare haath se chhu kar ye mai ga.i