Apni Sari Kawishon Ko Raegan Maine Kiya

Azad Gulati

apni saari kavishon ko ra.egan main ne kiya

mere andar jo na tha us ko bayan main ne kiya

sar pe jab saaya raha koi na dauran-e-safar

us ki yadon ko phir apna sa.eban main ne kiya

ab yahan par saans tak lena mujhe dushvar hai

kis tamanna par zamin ko asman main ne kiya

lamha lamha vaqt ke hathon kiya ḳhud ko supurd

sab ganva baiTha to phir fikr-e-ziyan main ne kiya

jab na us ke aur mere darmiyan kuchh bhi raha

ḳhud ko hi phir us ke apne darmiyan main ne kiya

donon chup the zor se chalti hava ke samne

phir achanak ḳhushk patton ko zaban main ne kiya