Tum Nahin Aae The Jab

Ali Sardar Jafri

tum nahin aae the jab tab bhi to maujud the tum

aankh men nuur ki aur dil men lahu ki surat

dard ki lau ki tarah pyaar ki khushbu ki tarah

bevafa vadon ki dildari ka andaz liye

tum nahin aae the jab tab bhi to tum aae the

raat ke siine men mahtab ke khanjar ki tarah

subh ke haath men khurshid ke saghar ki tarah

shakh-e-khun-rang-e-tamanna men gul-e-tar ki tarah

tum nahin aaoge jab tab bhi to tum aaoge

yaad ki tarah dhadakte hue dil ki surat

gham ke paimana-e-sar-shar ko chhalkate hue

barg-ha-e-lab-o-rukhsar ko mahkate hue

dil ke bujhte hue angare ko dahkate hue

zulf-dar-zulf bikhar jaega phir raat ka rang

shab-e-tanhai men bhi lutf-e-mulaqat ka rang

roz laegi saba ku-e-sabahat se payam

roz gaegi sahar tahniyat-e-jashn-e-firaq

aao aane ki karen baten ki tum aae ho

ab tum aae ho to main kaun si shai nazr karo

ki mire paas ba-juz mehr o vafa kuchh bhi nahin

ek khun-gashta tamanna ke siva kuchh bhi nahin