mustaqil haath milate hue thak jaata huun
men na.e dost banate hue thak jaata huun
abr avara huun main koi samundar to nahin
pyaas sahra ki bujhate hue thak jaata huun
malik kaun-o-makan ab to riha.i de de
jism ka bojh uThate hue thak jaata huun
to mire raaz batate hue thakta hi nahin
men tire raaz chhupate hue thak jaata huun
mere qadmon se lipaT jaati hai maan ki mamta
main kahin gaanv se jaate hue thak jaata huun
jaane kab ja ke mira ishq mukammal hoga
raqs karte hue gaate hue thak jaata huun
Leave a Reply