main sikhta raha ik umr hav-hu karna
yunhi nahin mujhe aaya ye guftugu karna
abhi talab ne jhamelon men Daal rakkha hai
abhi to sikhna hai teri aarzu karna
hamen charaghon se Dar kar ye raat biit ga.i
hamara zikr sar-e-sham ku-ba-ku karna
bhala ye kis ne kaha tha hayat-baḳhsh hai ye ishq
kabhi mile to use mire ru-ba-ru karna
kise ḳhabar kise milta hai lams-e-fikr-e-rasa
ḳhayal-e-yar ke zimme hai justuju karna
mujhe bhi ranj hai murjha ga.e vo phuul se log
bata raha hai mira zikr-e-rang-o-bu karna
sukut-e-shab ne sikhaya tha mujh ko aḳhir-e-shab
bala ka shor ho jab ḳhamushi rafu karna
Leave a Reply