phir yaad aa ga.i kisi shirin-dahan ki baat
jis ki har ek baat hai sher-o-suḳhan ki baat
anjan ban ke hal-e-gham-e-dil na puchhiye
aa ja.egi zaban pe zaḳhm-e-kuhan ki baat
sub.h-e-bahar lutf-e-suḳhan rang-e-ru-e-gul
har husn men nihan hai tire bankpan ki baat
kyon andalib chup hai saba majra hai kya
gulshan men ho rahi hai jo zagh-o-zaghan ki baat
dilli bahut hasin hai dilkash hai lucknow
lekin ye aur hi hai hamare dakan ki baat
sunte rahe zamane ki kaḌvi kaḌi magar
kahne na paa.e ‘tahira’ ham apne man ki baat
Leave a Reply