ḳhiraman shahid-e-simin badan hai
qayamat asmani pairahan hai
tabassum hai ki mauj-e-nur-o-nik.hat
nazar hai ya mohabbat ki kiran hai
miri masti ka andaza hai kis ko
nigah-e-naz meri ham-suḳhan hai
vo meri zindagi par hukmaran hain
mire bas men na ye tan hai na man hai
hazaron rang hain meri nazar men
tasavvur men kisi ki anjuman hai
ḳhayalon men mire lahra rahi hain
vo zulfen jin men bu-e-yasaman hai
abhi is men ḳhizan aane na paa.e
ye nau-ras arzuon ka chaman hai
kahan ab vo mazaq-e-sarfaroshi
zaban par qissa-e-dar-o-rasan hai
nahin badle tire ‘muztar’ ke andaz
vahi masti vahi divana-pan hai
Leave a Reply