Aatash O Injimad Hai Mujh Mein

atash o injimad hai mujh men

kaisa kaisa tazad hai mujh men

khvab se pahle kuchh nahin yaksar

jo bhi hai us ke baad hai mujh men

zakhm khulte hain saans ghutti hai

aisi bast-o-kushad hai mujh men

ranj-e-dil hai hara bhara ab tak

koi to hai jo shaad hai mujh men

dushmani ka hi rah gaya sarokar

varna kis ka mafad hai mujh men

koi is ka sabab nahin tu hi

ye jo itna fasad hai mujh men

koi jalsa hai zor ka jaise

jis ka ye iniqad hai mujh men

jise ab tak talash karta huun

gum-shuda ek yaad hai mujh men

andhiyan si jo chal rahi hain ‘zafar’

surat-e-khak-o-bad hai mujh men

Leave a Comment