Asra Rizvi
kabhi mushkil men jo paḌ jaa.e zarurat mohsin
mujhe mil pa.egi kya teri himayat mohsin
saath deta he shab-e-gham men kahan saaya bhi
kya nibha.egi vafa teri mohabbat mohsin
va.ada kar lena hai asan nibhana mushkil
saḳht hoti hai bahut rah-e-muravvat mohsin
rasta saaf ho saaya ho hava ThanDi ho
ham safar aise men karte hain inayat mohsin
zer-e-pa aag ho kanTe hon na saaya na hava
aise aalam men to mushkil hai rifaqat mohsin
vaqt ke saath khula karta hai yadon ka bharam
kahan ḳhush-fahm hai ‘asra’ ki tabi.at mohsin
Leave a Reply