tujh qaid se dil ho kar azad bahut roya
lazzat ko asiri ki kar yaad bahut roya
tasvir miri tujh bin ”mani” ne jo khenchi thi
andaz samajh us ka ”bahzad” bahut roya
naale ne tire bulbul nam chashm na ki gul ki
fariyad miri sun kar sayyad bahut roya
juen paḌi bahti hain ja dekh gulistan men
tujh qad se ḳhajil ho kar shamshad bahut roya
a.ina jo paani men hai gharq ye baa.is hai
tujh saḳht-dili aage faulad bahut roya
yaan tak mire mash.had se hai tishna-labi paida
is samt jo ho guzra jallad bahut roya
‘sauda’ se ye main puchha dil main bhi kisi ko duun
vo kar ke bayan apni rudad bahut roya
Leave a Reply