vo shaḳhs jo nazar aata tha har kisi ki tarah
hisar toḌ ke nikla hai raushni ki tarah
sada men Dhal ke labon tak jo harf aaya tha
ab us ka zahr bhi Dasta hai ḳhamushi ki tarah
ye saal tul-e-masafat se chuur chuur gaya
ye ek saal to guzra hai ik sadi ki tarah
tumhi koi shajar-e-saya-dar DhunD rakho
ki vo to apne liye bhi hai ajnabi ki tarah
ye ahd TuuT raha hai na.e ufuq ke liye
hayat Daal chuki hai ḳhud-agahi ki tarah
Leave a Reply