Wo Jo Be-Niyaz-E-Jahan Kare Mujhe Us Nazar Ki Talash Hai

Jaikrishn Chaudhry Habeeb

vo jo be-niyaz-e-jahan kare mujhe us nazar ki talash hai

jo tujhe bana de gham-ashna mujhe us asar ki talash hai

na rahe jahan pe pahunch ke phir kisi dar pe jaane ki aarzu

jahan ishq ki bhi hai aabru mujhe aise dar ki talash hai

jahan bikhri pyaar ki dastan jahan zarra zarra hai astan

vo miri zamin mira asman usi rahguzar ki talash hai

hain tujhi se husn ki shoḳhiyan hain tujhi se ishq ki garmiyan

dil-e-zinda teri talash hi miri umr bhar ki talash hai

vo bhi kya maze ki thi zindagi jo safar safar men guzar ga.i

nahin manzilon men vo dil-kashi mujhe phir safar ki talash hai

jahan raqs men ho kiran kiran jahan ghunche chaTken chaman chaman

nazar aa.e jis men vo sim-tan mujhe us sahar ki talash hai

ye tabassum un ka tha luT gaya sar-e-rah dil ka ye qafila

vo jo be-ḳhabar sa chala gaya usi be-ḳhabar ki talash hai

jahan dard-o-dagh ki justuju jahan nit na.i na.i aarzu

ki jise talash-e-sukun nahin mujhe us jigar ki talash hai