Tauseef Tabassum
meri surat saya-e-divar-o-dar men kaun hai
ai junun mere siva ye mere ghar men kaun hai
Thiik hai ai zabt-e-gham! aansu koi Tapka nahin
par ye dil se aankh tak paiham safar men kaun hai
vo to kab ka apni manzil par pahunch kar so chuka
chand kya jaane ki rah-e-pur-ḳhatar men kaun hai
main to us surat ka divana huun par ai zindagi!
surat-e-yak-umr haa.il sang o sar men kaun hai
ḳhaak chhanvati hai ye raton ko kis ki justuju
chandni ki tarah phaila dasht o dar men kaun hai
ek chehra mustaqil ashkon ke a.ine men hai
kuchh bata ai umr-e-gham aḳhir nazar men kaun hai
paanv men lipTi hui hai sab ke zanjir-e-ana
sab musafir hain yahan lekin safar men kaun hai
naghma-e-jan sunne vaalo ye takalluf ta-ba-kai
Dha ke ye divar bhi dekho ki ghar men kaun hai
Leave a Reply