ye silsile bhi rifaqat ke kuchh ajiib se hain
ki duur duur ke manzar bahut qarib se hain
qaba-e-zar hai ana ki agarche zeb-e-badan
magar ye ahl-e-hunar dil ke sab gharib se hain
yahan to sab hi isharon men baat karte hain
ajiib shahr hai is ke makin ajiib se hain
main zindagi men marungi na jaane kitni baar
mujhe khabar hai ki rishte mire salib se hain
ye aur baat ki us ki chahak se khilta hai
hazar shikve magar gul ko andalib se hain
use to apni khabar bhi yahan nahin milti
umiden tum ko bahut jis alam-nasib se hain
Leave a Reply