Khurshid Talab
kahan kisi ka banaya hua banate hain
naya banate hain jab ham naya banate hain
kisi ka naqsh banate hain lauh-e-dil par ham
kisi ka aks sar-e-a.ina banate hain
naya banane ki hasrat kabhi nahin marti
na.e sire se na.e ko naya banate hain
main ik zamin huun amn-o-aman ki mutlashi
mire aziiz mujhe karbala banate hain
hamari dasht-navardi ko gumrahi na samajh
bhaTakne vaale naya rasta banate hain
kahin bhi jaa.en kisi shahr men sukunat ho
ham apni tarz ki aab o hava banate hain
zaminen tang hui ja rahi hain dil ki tarah
ham ab makan nahin maqbara banate hain
”talab” jo log qana.at-pasand hote hain
vo zindagi ko kahan mas.ala banate hain
Leave a Reply