Poet
koi hunar to miri chashm-e-ashk-bar men hai
ki aaj bhi vo kisi ḳhvab ke ḳhumar men hai
kisi bahar ka manzar hai chashm-e-viran men
kisi gulab ki ḳhushbu dil-e-figar men hai
ajab taqaza hai mujh se juda na hone ka
ki jaise kaun-o-makan mere iḳhtiyar men hai
nishan-e-rah bhi Thahrega barishon ke ba.ad
abhi ye naqsh kisi raah ke ghubar men hai
ufuq ke aks kisi aa.ine men kya simTin
ki shauq-e-jalva abhi apne intishar men hai
makan ki koi ḳhabar la-makan ko kaise ho
safir-e-ruh abhi jism ke hisar men hai
kamal-e-zabt ki saa.at kahin guzar bhi ja
sitara-e-shab-e-gham mere intizar men hai
Leave a Reply